សិល្បៈ ៖ ខណៈដែលតារាចម្រៀងផលិតកម្ម ហង្សមាស បានសម្រេចចិត្តចាកចេញពីទ្រនំចាស់ជាបន្តបន្ទាប់មកច្រៀងនៅផលិតកម្ម ថោន ជាច្រើនរូបរួចមក នៅពេលនេះក៏ធ្លាយចេញព័ត៌មានតារាចម្រៀងកំពុងឡើងកូដរបស់ ហង្សមាស លោក ងួន ច័ន្ទដេវីត ម្នាក់ទៀត ក៏បានឆ្លៀតពេលមកចរចាជាមួយ ថោន ស្ងាត់ ប៉ុន្តែលទ្ធផលយ៉ាងណានោះមិនទាន់ចេញមកច្បាស់ទេ។
យោងតាមប្រភពព័ត៌មានក្រៅផ្លូវការពីក្រុមអ្នកបច្ចេកទេសនៅផលិតកម្ម ថោន បានបង្ហើបប្រាប់ថា តារាចម្រៀងកំពុងល្បីក្នុងស្រទាប់យុវវ័យរបស់ផលិតកម្ម ហង្សមាស លោក ងួន ច័ន្ទដេវីត ម្នាក់ទៀតហើយ ដែលទើបតែមកចរចាស្ងាត់ៗជាមួយផលិតកម្ម ថោន បន្ទាប់ពី ឈិត សុវណ្ណបញ្ញា យក់ ឋិតរដ្ឋា និង ស៊ុន ស្រីពេជ្រ ដែលទើបមកធ្វើជាតារាចំណូលថ្មីរបស់ ថោន ។
ការធ្លាយចេញព័ត៌មាន ងួន ច័ន្ទដេវីត បោះបង់ ហង្សមាស មកជ្រកនៅទ្រនំ ថោន ស្របពេល ដែលបទចម្រៀងវ៉ុលចូលឆ្នាំរបស់លោកបានចេញជាបន្តបន្ទាប់នៅ ហង្សមាស ក្នុងពេលថ្មីៗនេះ លោក តាន់ ចន្ថា អ្នកយកព័ត៌មាន Kqube.net ក៏បានទូរស័ព្ទសួរនាំបញ្ជាក់ពីលោក ងួន ច័ន្ទដេវីត បន្ថែមដែរ ប៉ុន្តែតារារូបនេះមិនបានឆ្លើយតបទេ គឺមានជំនួយការជាអ្នកលើកជំនួស ហើយបានឆ្លើយថា ដេវីត កំពុងជាប់ថត ដោយឲ្យខលទៅម្ដងទៀតរយៈពេល១៥នាទីក្រោយទើបបានជួប។ តែពេលយើងទំនាក់ទំនងជាថ្មីតាមការណាត់ នៅតែមិនជោគជ័យ ដោយជំនួយការដដែលនេះប្រាប់ថាសុំលើកទៅល្ងាចម្ដងទៀត។
ដោយឡែកលោក អុិន រិទ្ធីចិត្រ អ្នកគ្រប់គ្រងការផលិតនៅ ថោន បានប្រាប់ថា សម្រាប់ព័ត៌មានតារាចម្រៀង ងួន ច័ន្ទដេវីត មក ថោន គឺមិនទាន់ច្បាស់ទេ តែលោកពិតជាបានមកចរចាជាមួយ ថោន កាលពីប្រមាណជាមួយខែមុនពិតមែន ប៉ុន្តែស្របគ្នានេះលោកក៏មានបទចម្រៀង ចេញនៅ ហង្សមាស បន្តទៀតដែរ ដូច្នេះហើយលោកក៏មិនទាន់និយាយបានថា ជំនួបពិភាក្សារបស់ ដេវីត ជាមួយ ថោន ជោគជ័យ ឬបរាជ័យនោះទេ ព្រោះការងារនេះផុតដែនគ្រប់គ្រងរបស់លោក៕
0 comments:
Post a Comment