ប្រភពដើម៖
ប្រជាប្រិយ
រហូតមកដល់ពេលនេះតារាចម្រៀងរាងតូចស្រឡូន សម្បុរស្រអែម ប្រចាំផលិតកម្មសាន់ដេ
ខេមរៈ ស្រីពៅ បានបាត់មុខពីពិភពសិល្បៈអស់រយៈកាលប្រមាណជា ២ ឆ្នាំមកហើយ
ដោយការបាត់មុខពីពិភពសិល្បៈរបស់នាងហាក់ស្ថិតក្នុងភាពអាថ៌កំបាំងដដែល
ពោលគឺគ្មានពន្លឺណាមួយដែលអាចឱ្យគេបានដឹងពីដំរួយខ្លះៗពីនាងបានឡើយ ។
មួយរយៈកន្លងនៃការបាត់វត្តមានរបស់ ខេមរៈ ស្រីពៅ ពីវិស័យសិល្បៈ
គេគត់សម្គាល់ឃើញមានលេចឮព័ត៌មានអាស្រូវជាច្រើនកើតឡើងចំពោះនាងជាហូរហែថា
មូលហេតុដែលបណ្តាលឱ្យនាងបាត់មុខពីសិល្បៈនេះ
ដោយសារនាងមានជំងឺប្រតិកម្មស្បែកធ្ងន់ធ្ងរ និង
មានព័ត៌មានរសើបមួយទៀតថានាងកំពុងមានស្នេហាលួចលាក់នឹងអ្នកធំម្នាក់
ហើយសំងំលាក់ខ្លួនពួនអាត្មានៅប្រទេសថៃ ។
ជាមួយព័ត៌មានចចាមអារ៉ាមទាក់ទងនឹងរឿងរ៉ាវទាំងអស់នេះដែរ
ខាងសាច់ញាតិរបស់តារាចម្រៀង ខេមរៈ ស្រីពៅ គឺលោក ខេមរៈ សិរីមន្ត និង លោក
ខេមរៈ ភិរុណ ជាបងប្រុសក៏បានចេញមុខច្រានចោលជារឿយៗដែរថាជាព័ត៌មានមិនពិត ។
ទាក់ទងនឹងព័ត៌មានថាប្អូនស្រីមានជំងឺគឺលោកទទួលស្គាល់
ប៉ុន្តែមិនមែនជាជំងឺដែលគេបានលើកឡើងទេ
ដោយលោកធ្លាប់បានប្រាប់អ្នកសារព័ត៌មានថា ខេមរៈ ស្រីពៅ គ្រាន់តែមានជំងឺបំពង់ក
និង ក្រពះប៉ុណ្ណោះ ។ ជាមួយកំដៅព័ត៌មានឆេះងំនៅពេលនោះ ខេមរៈ ស្រីពៅ
ហាក់បានឱ្យដំរួយខ្លះៗតាមរយៈបណ្តាញសង្គម ដោយពាក្យ Comment
ខ្លីឆ្លើយតបមកកាន់អ្នកគាំទ្រ ប៉ុន្តែត្រូវស្ងាត់ទៅវិញ ។
ទោះបីជាមានការបកស្រាយពីបងប្រុសរបស់ ខេមរៈ ស្រីពៅ
ថានាងមិនមានបញ្ហាដូចពាក្យចចាមអារ៉ាម និង
ការឱ្យដំរួយមិនច្បាស់ការពីសាមីខ្លួនយ៉ាងណាក្តី
តែសម្រាប់ពេលនេះមហាជននៅតែដាក់មន្ទិលសង្ស័យនៅឡើយទាក់ទងនឹងការបាត់មុខរបស់នាងឈឹងដូច្នេះ
ព្រោះរហូតមលដល់ពេលនេះមានរយៈពេល ២
ឆ្នាំមកហើយដែលតារាចម្រៀងប្រចាំផលិតកម្មសាន់ដេម្នាក់នេះ
បន្តមិនព្រមបង្ហាញវត្តមានជាសាធារណៈ ដើម្បីលាងជម្រះមន្ទិលរបស់មហាជន ។
បើងាកទៅមើលលើទំព័រហ្វេសប៊ុករបស់តារាចម្រៀង ខេមរៈ ស្រីពៅ ឯណេះវិញ
គេមិនបានឃើញសកម្មភាពនាងលេងបណ្តាញសង្គមមួយនេះដូចតារាដទៃឡើយ
ព្រោះសូម្បីតែថតរូបថ្មីមួយសន្លឹកក៏មិនឃើញនាងបង្ហោះបង្ហាញភ្នែកមហាជនដែរ
ដែលទង្វើនេះបានធ្វើឱ្យមហាជនកាន់តែមិនអស់មិនហើយជាមួយនឹងការបាត់មុខនាង
ដែលធ្វើឱ្យពួកគេបារម្ភពីសុខទុក្ខរបស់នាងកើនទ្វេ
ខ្លាចនាងជួបរឿងដូចព័ត៌មានចចាមអារ៉ាមកាលពីកន្លង ។ ដោយហេតុនេះមហាជន
ជាពិសេសប្រិយមិត្តអ្នកគាំទ្រ
បានទទូចសុំឱ្យតារាចម្រៀងរូបនេះបង្ហាញវត្តមានផ្ទាល់ជាសាធារណៈដើម្បីឱ្យពួកគេបានអស់ចិត្ត
និង ឱ្យសមអ្វីដែលគេបានទន្ទឹងរង់ចាំនាងជាយូរមកហើយនោះ ។
គួររំឭកដែរថា តារាចម្រៀង ខេមរៈ ស្រីពៅ
បានបាត់មុខពីពិភពសិល្បៈក្រោយពេលនាងបានឡើងច្រៀងក្នុងកម្មវិធីប្រគំតន្ត្រីមួយ
ដែលគិតតាំងពីពេលនោះរហូតមកដល់ពេលនេះមានចំនួនប្រមាណជា ២ ឆ្នាំ មកហើយ
ហើយកំលុងពេលនាងបាត់មុខនេះមានផ្ទុះព័ត៌មានមួយថានាងត្រូវបានញាំញីដោយសារជំងឺប្រតិកម្មស្បែកធ្ងន់ធ្ងរ
ឈានដល់ដំណាក់ការដេកដួលលើស្លឹកចេកទៀតផង ៕
សាកល
