លោក ដួង សុខគា បានសម្រេចដើរចេញពីកម្មវិធី”សំណើចតាមភូមិ”និង “ផ្ទះលោកតា” របស់CTN ក្នុងនោះ លោកបញ្ជាក់ថា ដោយសារមានការអាក់អន់ចិត្តទៅនឹងពាក្យសំដីមើលងាយខ្លះៗ របស់នាយពែកមី និង នាងខ្ញុង ក្នុងកម្មវិធីកាត់សក់មួយ ។ ខ្ញុង បានចេញមុខ ធ្វើការពន្យល់ខ្លះៗលើហេតុការណ៍នេះ។ខ្ញុង និយាយថា ខ្លួនរួមជាមួយនាយ ពែកមី មិនដឹងខ្លួនទាល់តែសោះទៅលើការចោទប្រកាន់របស់ លោក ដួង សុខគា ថាអ្នកទាំង២បានមើលងាយ។ នាងថា មិនដែលបានមើលងាយ រៀមច្បងឡើយ ពេលជួបមុខម្ដងៗ មានតែជម្រាបសួរ មិនដែលអាក់ខានឡើយ ។ខ្ញុងលើកឡើងថា ការពិតលោក ដួង សុខគា ចិត្តច្រើន ព្រោះឧស្សាហ៍អន់ចិត្តជាមួយក្រុមការងារជាច្រើននាក់ ហើយសុំឈប់ជាច្រើនលើក ប៉ុន្តែបាននាយ ពែកមី ចេះតែតាមអង្វរ។
តារាកំប្លែងស្រីសំដីស្រួយរួបនេះបានឲ្យដឹងបន្ថែមថា កម្មវិធី “ផ្ទះលោកតា” មានពេលខ្លះនាយពែកមី ត្រូវស្លៀកខោអាវចាំខ្លាចលោក ដួង សុខគា មិនមកធ្វើជាពិធីករ ព្រោះឧស្សាហ៍ឈប់ ប៉ុន្តែពេលលោក ដួង សុខគា មក នាយពែកមី សុខចិត្តដោះខោអាវចេញវិញប្រគល់កម្មវិធីឲ្យវិញទៀតផង។
សូមស្ដាប់ការបកស្រាយរបស់ នាងខ្ញុង ជុំវិញបញ្ហាទាំងនេះ៖
នាងថា ក្រុមកំប្លែងរបស់នាង រួមជាមួយលោកតា វ៉ិចទ័រ គ្រោងនឹងធ្វើវីដេអូឃ្លីបមួយ ក្នុងពេលឆាប់ៗនេះ ដើម្បីបកស្រាយបញ្ហានេះ។
ជុំវិញបញ្ហាខាងលើក្រុមការងារ Sabay បានព្យាយាមធ្វើការទាក់ទងទៅលោក ដួង សុខគា បន្ថែមទៀតដើម្បីលម្អិតកាន់តែច្បាស់ ដោយលេខទូរស័ព្ទលោកខលចូលច្រើនសារ ប៉ុន្តែមិនមានអ្នកទទួល។ យ៉ាងណាមិញកាលពីម្សិលមិញលោក ដួង សុខគា ក៏ បានបញ្ជាក់រួចម្តងដែរថា លោកទទួលស្គាល់ ការឈប់ពីកម្មវិធី”សំណើចតាមភូមិ” និង “ផ្ទះលោកតា” ដោយសារតែមានការអាក់អន់ចិត្ត ពីនាយ ពែកមី និង នាងខ្ញុង ក្នុងកម្មវិធីកាត់សក់មួយជាមួយគ្នា ។ ការបោះសម្ដី មិនគោរពចាស់ទុំរបស់តារាទាំងពីរខាងលើ លោកប្រាប់ថា មិនមែនតែលើកទី១នោះឡើយ។ តែលោកសូម មិនអធិប្បាយ បញ្ហាខាងលើ ឲ្យលើសពីនេះឡើយ។
ជុំវិញការគ្រោងធ្វើវីដេអូឃ្លីបដូចការលើកឡើងខាងលើ លោក សុវណ្ណ រិទ្ធី ហៅ លោកតា វ៉ិចទ័រ បានប្រាប់ថា ឆាប់ៗនេះលោក នឹងហៅ ភាគីទាំងអស់មកជួបជុំគ្នា ដើម្បីដោះស្រាយបញ្ចប់រឿង មិនចង់ឲ្យរឿងកាន់តែវែងឆ្ងាយថែម ព្រោះទាំងសង្ខាងសុទ្ធតែកូនចៅ ប្រៀបបានទៅសាច់ញាតិទាំងអស់។ តា វ៉ិចទ័រ ថា លោកកំពុងតែរកពេលដើម្បី ជុំគ្នាដោះស្រាយបញ្ហានេះ ហើយលោកជឿជាក់ថា ដួង សុគា នាយ ពែកមី នាងខ្ញុង ក៍ដូចជាកូនចៅក្រោមឱវាទរបស់លោកទាំងអស់ និង មកចូលរួមតាមការអញ្ជើញរបស់លោក៕
0 comments:
Post a Comment